प्रथम राप्ती ल्होछार महोत्सव भोलि देखि सुरु, अर्थमन्त्री लामाले उद्घाटन गर्ने

२३ माघ २०८० राप्ती ९ वानग्रुपमा हुन गइरहेको ‘प्रथम राप्ती सोनाम ल्होछार साँस्कृतिक उत्सव २०८० महोत्सव’को सम्पूर्ण तयारी पूरा भएको छ । भोलि (बुधबार) देखि सुरु हुने महोत्सवको उद्घाटन आर्थिक मामिला तथा योजना मन्त्री बहादुरसिंह लामाले गर्ने महोत्सव संयोजक देवराज लामाले जानकारी दिए ।
संयोजक लामाका अनुसार महोत्सवको पूर्वसन्ध्यामा आजै दिउँसो २ बजे बृहत मोटरसाइकल र्याली हुँदैछ । उनले र्यालीमा सम्पूर्ण जनसमुदाय तथा स्थानीयलाई सहभागिताको लागि आह्वान समेत गरेका छन् ।
चितवनमै पहिलो पटक राप्तीमा तामाङ समुदायको संस्कार, संस्कृति र भेषभूषाको जगेर्ना गर्ने उद्देश्यले महोत्सवको आयोजना गरिएको हो । श्री च्योमदेन दे ढा च्योम गुम्बाको आयोजनामा उक्त महोत्सव हुन लागेको महोत्सव माघ २४ गतेदेखि २७ गतेसम्म (चार दिन) सञ्चालन हुनेछ ।
२० वटा स्टल रहने महोत्सवमा विशेष गरी तामाङको खानाका परिकार, पहिलेको पुस्ताले प्रयोग गर्ने घरायसी स्रोत साधन, धर्म संस्कृति अनुसार पाठपूजाको प्रदर्शन हुनेछ भने सँगसँगै अन्य समुदायको खानाको परिकार र भेषभूषाको स्टल राखिने छ । महोत्सवमा विशेषगरी तामाङ संस्कृति झल्किने डम्फु सेलो, फापरी सेलो, मेन्दो सेलोलाई जोड दिइने आयोजकले जनाएको छ ।
चितवन, मकवानपुर लगायत अन्य ठाउँका तामाङ समुदायले यस महोत्सवलाई विशेष चासोको रुपमा हेरेको छ भने भोलि हुने वृहत र्यालीमा व्यापक जनसहभागिता हुने अनुमान समेत गरिएको छ ।